«Musa bilen Harun ýygnagy gaýanyň öňünde ýygnadylar, Musa olara: ‘Diňläň, siz pitneçiler! Biz size bu gaýadan suw çykarmalymy?’ diýdi.» (Sanlar 20:10)
Musanyň Ýewreý halkyndan näme üçin lapykeç bolandygyny görmek aňsat. Olar şeýle bir gaty ýürekli we imany gowşakdy welin, Musa sabyr-takadyny ýitirdi we olara gaharlanyp başlady. Ýöne Musa ünsüni Hudaýdan başga ýere sowan her gezek, bu oňa gymmat düşdi. Ol öz halkyna kömek etmek üçin işleri öz eline alanda, indiki kyrk ýyly çölüň içinde goýun bakyp geçirdi (Müsürden Çykyş 2:11-15). Bu gezek onuň howlukmaç hereketi oňa Wada edilen ýere girmek mümkinçiligini ýitirdi (Sanlar 20:12). Halkyň hormatsyzlygyndan lapykeç bolup, Musa Hudaýyň görkezmelerine açykdan-açyk boýun egmezlik edip, şol bir günäni etdi. Bu nähili boldy? Musa ünsüni Hudaýyň işine däl-de, beýlekileriň hereketine gönükdirmäge rugsat berdi.
Bu siziň bilen hem bolup biler. Hudaý siziň töweregiňize siziň gullugyňyza mätäç adamlary goýdy. Emma, esasy ünsüňiz Hudaýda bolmasa, siz olara dogry kömek edip bilmersiňiz. Eger siz adamlara, olaryň gowşaklyklaryna, boýun egmezliklerine, iman ýetmezçiliklerine we inatçylyklaryna üns berseňiz, olar sizi çalt lapykeç eder. Siz, Musa ýaly, özüňizi ýazgarýan günäleri edip bilersiňiz. Emma, eger gözüňiz mukaddes Hudaýa dikilen bolsa, siz Oňa has meňzeş bolarsyňyz — rehimdar, bagyşlaýjy, sabyrly we dogry. Dostuňyzyň hereketi sizi lapykeç edende, derrew Rebbe gidiň. Dostuňyzyň günäsine üns bermekden daşda, Hudaýyň dostuňyzyň durmuşynda näme etmek isleýändigini bilmäge çalyşyň. Şonda siz Hudaýyň isleýän ýoly bilen dostuňyza kömek etmek üçin zerur güýje, akyldarlyga we sabyr-takada eýe bolarsyňyz.
