Hýudson Teýloryň imana gelmeginiň we missiýa meýdanyna çagyrylmagynyň ikisi hem onuň ene-atasynyň doga durmuşynda şu aýatyň hakykatynyň mysallarydyr:
Eger siz ynanýan bolsaňyz, dogada näme soraýan bolsaňyz, şony alarsyňyz. (Matta 21:22)
Hýudsonyň halas bolmagy üçin aýratyn we dynuwsyz doga eden onuň ejesidi. Gürrüňe görä, ol öýünden seksen milden gowrak uzakda bolup, Ruh ony oglunyň imana gelmegi üçin yhlasly doga etmäge iterende, özüne köp wagt tapypdy.
Ol Rebe ýalbarýan pursatynda, öýde, on bäş ýaşly Hýudson «Mesihiniň Gutaran Işi» atly bir kitapçany tapdy. Ol ony diňe wagt geçirmek üçin okasa-da, Mukaddes Ruh onuň ýüregini okan her bir sözüne açdy. Ejesi dogasyna jogap berendigi üçin Hudaýa şükür edýän pursatynda, Hýudson dyzlarynyň üstünde Isany öz Halasgäri hökmünde kabul edýärdi. Olar birnäçe hepde soň duşuşyp, hekaýalaryny paýlaşanlarynda, her biri jogap berlen doganyň gudratyndan lezzet aldy.
Birnäçe ýyl soň, Hýudson missiýoner bolmaga we Hudaýyň Sözüni içerki Hytaýa ýetirmäge iterildi, ol ýerde hiç kim Onuň barada eşitmedikdi, Ol bolsa
Özüniň üsti bilen Hudaýa gelýänleri doly halas etmäge ukyplydyr. (Ýewreýler 7:25)
Hýudson Hytaý Içerki Missiýasyny gurandan soň, kakasy oňa Hytaýa çagyrylmagynyň doga jogapdygyny açdy. Hýudson dogulmazdan ozal, takmynan 1830-njy ýylda, kakasy Hytaýyň ruhy ýagdaýyna gaty gyzyklanypdy. Şol wagt ol Hudaýdan özüne Hytaýa missiýoner bolup gidip biljek bir ogul bermegini dilemäge başlady. We Ol berdi!
Hýudson Teýloryň durmuşy köp adamy missiýoner bolmaga ruhlandyrdy. Onuň ene-atasynyň doga durmuşy bizi hem Rebbe gulluk etmäge, janlaryň halas bolmagy üçin yhlasly doga etmäge ruhlandyrmaly dälmi – hem öz maşgalamyzda, hem uzak ýurtlarda?
