«Isa: «Ata, olary bagyşla, çünki näme edýänlerini bilmeýärler» diýdi.» (Luka 23:34) Reb Isa haçda asylanda, Onuň deşilen elleri, adamçylyk nukdaýnazaryndan, indi näsaglara hyzmat edip bilmeýärdi. Çüýler bilen deşilen aýaklary indi şäherler we obalar arkaly Patyşalygyň Hoş Habaryny wagyz etmek üçin ýöräp bilmeýärdi. Hatda ähli gaçan şägirtlerine-de, Ol indi öwredip bilmeýärdi.
Bu elhenç sagatlarda adamlara bereket bolmak üçin Ol hiç zat edip bilmezmidi? Hawa, Ol doga edip bilýärdi – we Ol hut şony etdi! Ol asman bilen ýeriň arasynda asylanda, «günäkärler üçin şepagat etdi» (Işaýa 53:12). Her birimiz üçin möhüm sapak!
Reb Isanyň göreldesi, adamçylyk nukdaýnazaryndan, halas bolmagy mümkin däl ýaly görünýänler üçin doga etmäge-de ruhlandyrýar. Bu ýagdaýda, bu ganhorlar üçin iman bilen kim doga ederdi? Emma Hudaýyň Oglunyň hut bu dogasy, takmynan 50 günden soň 3000 adamyň bir wagtda imana gelmegine goşant goşmadykmy?
Günäkärleriň iň ulusy üçin kim doga etdi – Hudaýyň ýygnagyny gan dökülýänçä yzarlaýan, imanlylary türmelere saldyran we şägirtleri Halypasynyň adyna küpür etmäge mejbur eden adam üçin? Stefan! Hudaý muňa nähili jogap berdi? Ol öňki küpür edijini, yzarlaýjyny we gödek garşydaşy (seret 1 Timoteos 1:13) Hoş Habaryň we Hudaýyň ýygnagynyň hyzmatkäri etdi (seret Koloseliler 1:23, 25). Hudaýyň merhemeti bu adamy Täze Ähtiň 14 hatyny ýazmak we beýleki ähli resullardan has köp işlemek üçin ulandy (seret 1 Korinfliler 15:10)!
Häzirki wagtda keseliň ýa-da beýleki ýagdaýlar sebäpli Rebe etmek isleýän belli bir işiňizde işjeň bolup bilmeýärsiňizmi? Belki-de, Hudaý sizi bir gyra çekendir, şepagat dogasynyň möhüm gullugynda has köp wagt geçirmegiňiz üçin.
Tanyşlaryňyzyň arasynda imana gelmekleri düýbünden umytsyz görünýän adamlar üçin doga etmegi bes etmäň. «Adam üçin bu mümkin däl, ýöne Hudaý üçin däl. Çünki Hudaý üçin ähli zat mümkin» (Markus 10:27)!
