Isa ýer ýüzünde köp adamlary sagaltdy. Bir gezek on sany heýwere meňzeş deri keselli adam Oňa kömek sorap geldi (Luka 17:11-19). Olar uzakda durup, “Isa, Halypa, bize rehim et” diýip gygyrdylar. Isa olaryň imanlaryny sylaglap, özlerini ruhanylara görkezmegi buýurdy. Ýewreý jemgyýetinde ruhanylar ýokanç deri keselinden sagalan adamy tassyklaýardylar (Lewiler 14:1-32). Olar ruhanylara tarap barýarkalar, gudrat bilen sagaldylar.
Soňra olaryň biri Isanyň ýanyna gaýdyp geldi. Ol Isanyň aýaklaryna ýykylyp, Oňa sag bolsun aýtdy we gaty ses bilen Hudaýy wasp etdi. Ol pespäl, minnetdar we sag bolsun aýdýan adamdy. Bu geň galdyryjydy, sebäbi ol Samariýalydy we ýewreýler tarapyndan ýigrenilýärdi (Ýahýa 4:9). Isa ony ýat ýurtly diýip atlandyrdy (Luka 17:18), bu söz pitneçileri beýan etmek üçin hem ulanylýardy (Ýahýa 8:48). Samariýalynyň jogap bermezinden öň, Isa: “Sagalyp gaýdyp gelmedik beýleki dokuz adam nirede?” diýip sorady. Olar Rebbiň ýanyna sag bolsun aýtmak üçin gaýdyp gelmediler.
Şonuň ýaly-da, Isa ynsanlara rehim etdi we bizi günälerimizden halas etmek üçin geldi (Matta 1:21). Ol günäniň kesel ýaly bir zatdygyny aýtdy (Mark 2:17). Bu mysaly ulanyp, iman edenler bu keseliň netijelerinden sagaldyldy. Biziň jogabymyz näme? Eger biz Mesihyň gudratly işine ynanan bolsak, minnetdar Samariýaly ýaly bolarysmy ýa-da Sagaldyjyny unudan dokuz adam ýaly bolarysmy?
Mesihçiler “Rebbimiz Isa Mesihiň adyndan ähli zat üçin Hudaý Ata hemişe şükür etmelidirler” (Efesliler 5:20). Bu ähli ýagdaýlarda minnetdar bolmak we “minnetdarlyk bilen dolup-daşmak” diýmekdir (Koloseliler 2:7; 3:15; 4:2; 1 Selanikliler 5:18). Biz Hudaýy durmuşymyzda bolan özgerişler üçin hem wasp etmelidiris (1 Petrus 2:9). Bu Hudaýa hemişelik “wasp gurbany” hökmünde hödürlenmelidir (Ýewreýler 13:15).
