Ýahýa bu «ölülerden ilkinji doglan» diýen sözi Reb Isa kimdigini beýan etmek üçin ulananda, Ol ölülerden ilkinji direlen adam hökmünde gürleýän däldir. Köne Ähtde ölülerden direlenler bardy, mysal üçin, Zarefatly aýalyň ogly (1 Patyşalar 17:8–24), ýa-da Şulamly aýalyň ogly (2 Patyşalar 4), ýa-da hatda Elişanyň süňklerine degen adam (2 Patyşalar 13). Täze Ähtde biz Ýairusyň gyzy, Nainli dul aýalyň ogly we Lazar barada öwrenýäris—olaryň hemmesi ölülerden direldi.
Emma bu aýatymyzda biz Rebbiň ölülerden ilkinji doglanlygyny öwrenýäris. Bu söz dereje we mertebe, ýa-da wezipe boýunça birinjilik manysyny berýär. Ol wagt boýunça ilkinji doglan diýmek däl, eýsem beýiklikde birinjilik diýmekdir. Reb Isa iň ýokary orny eýeleýär. Bu messianik zeburda açyk görünýär: «Men Ony Öz ilkinji doglanym, ýer ýüzüniň patyşalarynyň iň beýigi ederin» (Zebur 89:27).
Reb Isa barada okaýan indiki zadymyz, Onuň «ýer ýüzüniň patyşalarynyň hökümdary» bolmagydyr. Hemmeden ýokary göterilensoň, Ol ýer ýüzüniň ähli patyşalarynyň hökümdarydyr! Ol Rebler Rebbi we Patyşalar Patyşasydyr (Ylham 17:14). Bu, Mesih Öz şöhratly gelmeginde gaýdyp gelende (19:11–16), geljekde hemmelere aýan ediler. Reb Isa Köne Ähtde bütinleý pygamberlik edilen ýaly (Zebur 2:6–8; Ýeremiýa 23:5; Zakarýa 9:9), ýer ýüzüniň hökümdar Patyşasy hökmünde görünýär we görünjekdir.
4 we 5-nji aýatlarda Ýahýa Reb Isa sežde etmek üçin birnäçe sebäp berdi. Ol wepaly şaýat, ölülerden ilkinji doglan we ýer ýüzündäki ähli patyşalaryň hökümdarydyr. Biziň bereketli Rebbimize Onuň Şahsyýetiniň şöhraty we Onuň amala aşyran işiniň şöhraty sebäpli sežde edilmelidir!
