Ýahýa çokundyryjynyň çekirtge we ýabany bal iýmiti biziň saýlap aljak iýmitimiz bolmasa-da, ol ony ekleýärdi. Çekirtgeler aýratyn gyzyklydyr, sebäbi köp uçýan mör-möjeklerden tapawutlylykda, olar arassa haýwanlar hökmünde klassifikasiýa edilipdi. Köne Ähtdäki iýmit kanunlaryna görä, bognakly aýaklary bolan, böküp bilýän ähli uçýan mör-möjekler, mysal üçin çekirtgeler, çyrlaklar we çygylçylar arassa hasaplanyp, iýilip bilinýärdi (Lew. 11:21–22). Beýleki uçýan mör-möjekler uçmadyk wagty ýerde süýşýärdiler we şonuň üçin arassa däl hasaplanypdyrlar (Lew. 11:20) — käbirleri, mysal üçin kebelekler, owadan we özüne çekiji bolsa-da.
Çekirtgelerden näme öwrenip bileris? Birinjiden, olaryň bökýän mör-möjekler hökmündäki tebigaty olaryň hakykatdanam ýer jandarlary däldigini görkezýär. Käbir mör-möjekler birwagt uçýarlar, ýöne soň ýerde ýöreýärler. Şonuň ýaly-da, bu dünýäniň adamlarynyň beýik ideallary bolup biler, ýöne olar “ýerde ýaşaýarlar” (Ylh. 17:8) we gögüň Hudaýyny ret edýärler. Munuň tersine, çekirtgeler mümkin boldugyça köp wagty howada geçirýärler. Imanlylar hökmünde, biziň bu ýer bilen baglanyşygymyz hem gaty az bolmaly. Biz dünýäde ýaşamaly, ýöne biziň ruhy instinktimiz gökden bolmaly.
Çekirtgeleriň doýmaz-dolmaz iýmitlenmegi başga bir meşhur häsiýetidir. Hudaý köplenç çekirtge sürülerinden we olaryň netijesinde ýüze çykýan weýrançylyklardan höküm guraly hökmünde peýdalanypdyr. Ýöne oňyn tarapdan, her bir imanly Hudaýyň Sözüne şol bir çäksiz islegi bolmaly. Nirede hakykatyň ýaşyl şahasyny tapsak, ony iýeliň!
Üçünjiden, Mukaddes Ýazgylar çekirtgeleri öwýär, sebäbi olaryň “patyşasy ýok, ýöne hemmesi hatar-hatar öňe gidýärler” (Sül. tym. 30:27). Biziň Rebimiz hem görünmeýär. Biz çekirtgeler ýaly hatarda durup bilermik? Hudaýyň Ruhy arkaly, her birimiziň oýnamaly rolumyz we ulanmaly sowgadymyz bar. Goý, biz muny güýç we wepalylyk bilen edeliň.
