Siziň iman durmuşyňyzda şu gün we bu täze ýylda näme durnuklylyk berip biler we näme ösüşi üpjün edip biler? Hudaýyň beýikligi we şöhraty bilen meşgullanmak! Hiç zat bize Onuň nähili özboluşly, deňsiz-taýsyz we ajaýypdygyny bilmekden we duýmakdan has köp parahatçylyk we hakyky kanagatlanma berip bilmez - we bu Hudaýyň üýtgewsizligi babatda-da dogrydyr.
Biz ähli zadyň üýtgeýän döwründe ýaşaýarys: Jemgyýet, tebigat, hökümetler, howa, ykdysadyýet, sungat, saz, pikirler, ahlak gymmatlyklary, tehnologiki innowasiýalar arkaly durmuş ýörelgämiz we başga-da köp zatlar. Birwagt görmedik adamlaryňyz birden duşuşanyňyzda üýtgän bolýarlar. Belli bir wagtda kellelerimizde çal saçlary tapýarys. Adam bedeni her gün, her minut üýtgeýär. 969 ýaşynda iň garry adam bolan Metuselah özünde we töweregindäkilerde näçe üýtgeşme gördi?!
Pawlus Rimlilere hatynda bu ýaradylyşyň boşluga ýa-da geçegçilige tabyn bolýandygyny ýazýar (Rimliler 8:20 serediň). We bu ýaradylyşlar üçin hem dogrydyr. Zeburçy aýdýar: «Sen olaryň dem alşyny alýarsyň: olar ölýärler we topraga gaýdyp gelýärler» (Zebur 104:29).
Ýöne biz üýtgäp, töweregimizdäki ähli zat üýtgäp durka, hemişe şol bir bolup galýan Bir bar: Diri Hudaý - asyrlaryň Gaýasy! Biziňki ýaly däl-de, Ol üýtgewsizdir. Zebur 102 aýdýar:
Sen gadymdan ýeriň düýbüni tutduň, we asmanlar Seniň elleriň işidir. Olar ýok bolar, ýöne Sen galarsyň; we olaryň hemmesi eşik ýaly garry bolar: Sen olary geýim ýaly üýtgedersiň, we olar üýtgärler. Ýöne Sen şol birsiň, we Seniň ýyllaryň gutarmaz. (Zebur 102:26-28)
Bir tarapdan, Hudaýyň galýandygy aýdylýar - bu Onuň ebedidigini aňladýar. Beýleki tarapdan bolsa, Onuň şol biridigini - ýagny Onuň üýtgewsizdigini aýdylýar. Hudaý ýeri döretdi we ony ýene ýok eder. Ol zatlary üýtgedýär, ýöne Özüni üýtgetmeýär. Ilkinji ýaradylyşyň başlangyjy hem, soňy hem kesgindir. Şonuň üçin, geçegçi we tizden ýok boljak bir zada ýüregimizi baglamak nähili akmaklykdyr.
Dünýä we onuň höwesleri geçip barýar, ýöne Hudaýyň islegini ýerine ýetirýän ebedi galýar. (1 Ýahýa 2:17)
Hudaý kämil we ajaýyp. Şonuň üçin Ol has gowy tarapa üýtgäp bilmez! Üýtgeşme hemişe ýa gowy, ýa-da erbet tarapa bolýar. Ýöne bu Hudaý bilen mümkin däl - sebäbi Ol kämil. Onuň ösmegine ýa-da öňe gitmegine zerurlyk ýok. Hudaýyň üýtgewsizligi Onuň şöhratlaryndan we häsiýetlerinden biridir. Üýtgeşme Ony kämil däl ederdi - we bu düýbünden mümkin däl!
Ol bu gün nähili bolsa, tebigatynda, häsiýetlerinde we ahlak sypatlarynda, hemişe şeýle bolupdyr we hemişe şeýle bolar.
